NIskuża ruħi li domt ma weġibt għall-mistoqsija: Meta għandi nitqarben u meta ma nistax nitqarben u xi tfisser tkun fil-grazzja t'Alla. Tajjeb li nżommu f'moħħna dak li dejjem tgħallem il-Knisja li d-dnub tagħna jaffettwa lil kulħadd u dan għaliex permezz tal-Magħmudija aħna sirna nagħmlu parti 'ta veru' fil-familja t'Alla. Għalhekk ngħidu aħna, meta fil-familja jkun hemm xi inkwiet, xi problema, xi mewt eċċ, il-familja kollha titnikket. L-istess meta jkun hemm xi esperjenza ta' ferħ bħal ngħidu aħna xi suċċess, xi anniversarju ta' ferħ, il-familja kollha tifraħ. Għalhekk, għax aħna il-familja t'Alla bil-magħmudija, id-dnub personali jaffettwa lil kulħadd. Id-dnub tiegħi u tiegħek jaffettwa lil kulħadd u dan għaliex aħna, barra li aħna il-familja t'Alla aħna wkoll nagħmlu parti mill-Ġisem ta' Kristu. San Pawl għandu tagħlima sabieħa ħafna fuq il-Ġisem ta' Kristu meta jgħid aħna l-Ġisem ta' Kristu u kull wieħed minn membri tiegħu. Xi tfisser tkun fil-grazzja t'Alla? Tkun fil-grazzja t'Alla tfisser il-ħajja li Alla jagħti lilna. Il-ħajja li jagħti Alla lilna hi l-istess ħajja tiegħu. Biex nagħtu eżempju li jista' ma jkunx eżatt huwa tat-tarbija li tkun fil-guf ta' l-omm. It-tarbija qed tgħix għax qed tieħu mill-istess ħajja ta' l-omm. Issa il-kuntrarju ta' dan huwa li jiena ma nkunx fil-grazzja t'Alla meta nagħżel id-dnub, meta niddeċiedi li nwebbes rasi u nagħmel dak li hu ħażin. Parti oħra interessanti ta' dil-mistoqsija hija: meta nista nitqarben? Jekk inti għandek dnub żgħir, dak li aħna nsejħlulu dnub venjal, inti tista' titqarben. Ikun biżżejjed li tagħmel l-ilma mbierek b'sinjal ta' ndiema biex dan id-dnub jinħafer. Imma inti għandek dnub kbir, dak li aħna nsejħulu dnub mejjet, inti għandek tqerr qabel ma titqarben. Forsi bħalissa hawn min jgħid: Imma kif inkun naf jekk għandix dnub kbir jew dnub żgħir? Ovvju li ma nistax nagħti tweġiba mill-web site. Għalhekk nissuġġerixxi il-qrar regolari; nissuġġerixxi il-qari tal-Kelma t'Alla li tmexxina u ddawwalna; nissuġerixxi t-talb lil Alla ħalli jdawwal il-kuxjenza tagħna biex allura nagħrfu dak li Alla jrid minnha. Nawgura lil din il-persuna li jkollha ħafna paċi u ferħ f'ħajjitha.

Jiena meta nitqarben inhoss lil Ġesu' jagħtini ħafna kuraġġ bil-preżenza tiegħu fija. Li nixtieq nistaqsi hu meta wieħed jista' u meta ma jistax jitqarben għax xi kultant niġi fid-dubju. Xi tfisser "tkun fil-grazzja ta' Alla" li ma jkollok ebda dnub u allura trid tqerr kull darba li tkun ser titqarben?