Għeżiez tiegħi

Kont ili ħafna nisma’ kummenti li l-website li kellna qabel kient skadiet. Ħafna tilfu kull interess li jidħlu fil-website u dan għaliex ma kellniex min jieħu ħsiebha.  

Issa, bil-għajnuna t’Alla u  ta’ grupp ta’ nies mill-parroċċa u bil-għajnuna ta’ nies esperti fuq dan il-qasam, wasalna biex nintroduċu website ġdida u iktar attraenti, web site denja għall-parroċċa tagħna.  

Filfatt, din l-idea ħarġet minn diskussjoni interessanti li kellna matul l-Assemblea Parrokkjali li saret f’Novembru li għadda. Kienu ħafna dawk li qalu kemm hemm bżonn li l-parroċċa jkollha website li tkun ta servizz għalikom. Għalhekk inħeġġeġ lil kulħadd ħalli jżur din il-website u tgħinuna nżommuha, ħajja u friska.  Hawn taħt qed nagħtu spjega ta’ kif inhi mqassma l-website.

Fuq in-naħa ta’ fuq tal-website għandkom issibu sezzjoni bl-Avviżi li jinqraw fil-quddies ta’ kull nhar ta’ Ħadd, kif ukoll sezzjoni dedikata b’mod speċjali għat-tfal. Dawk li jixtiequ li jipparteċipaw f’diskussjonijiet jistgħu jagħmlu dan billi jidħlu fis-sezzjoni tal-Forum. Jekk tixtiequ tagħmlu kuntatt magħna tistgħu tidħlu fis-sezzjoni li jisimha kuntatt. Fil-parroċċa taż-Żurrieq ikunu għaddejin diversi attivitajiet matul is-sena, li jkunu organiżżati kemm mis-saċerdoti kif ukoll mid-diversi għaqdiet tal-parroċċa. Il-kalendarju jżommok infurmat b’dawn l-attivitajiet skond id-data.

In-naħa tax-xellug tal-website hija dedikata l-aktar għall-informazzjoni. F’din in-naħa għandek issib l-istorja tal-Parroċċa u taż-Żurrieq, informazzjoni fuq is-saċerdoti tal-parroċċa, il-ħinijiet tal-quddies u tad-duttrina, lista’ ta’ ħwienet u servizzi fil-parroċċa li bħalissa qed jidhru fuq id-djarju tal-parroċċa, kopja tal-pjan parrokjali u lista’ ta’ l-għaqdiet li jiltaqgħu fiż-Żurrieq. Fuq in- naħa tax-xellug tal-website għandek issib ukoll xi ritratti. Jekk tixtieq tħalli xi kumment tista’ tagħmel dan billi tidħol fil-guest book. Is-sezzjoni tal-links tinkludi lista ta’ links ta’ websites oħra li jistgħu jkunu utli għalikom.

Dun Charles Attard

Arċipriet